Jihar Jigawa Za Ta Gudanar Da Ayyuka Na Musamman A Bangaren Kiwon Lafiya

Majalisar zartarwa ta jihar Jigawa ta amince da fitar da kimanin Naira Miliyan dubu uku domin gudanar da ayyuka a bangaren kiwon lafiya.

Kwamishinan yada labarai, matasa da wasanni da raya al’adu Alhaji Sagir Musa Ahmad ya bayyana haka ga manema labarai bayan kammala taron majalisar zartarwa ta jihar wanda Gwamna Umar Namadi ya jagoranta a gidan gwamnati.

Alhaji Sagir Ahmed ya bayyana cewar ayyukan da za a gudanar sun hada da katange harabobin manyan asibitoci da samar da wuta lantarki mai amfani da hasken rana a cibiyoyin kula da lafiya matakin farko guda 30.

Ya kara da cewar majalisar ta amince da fitar da naira miliyan dubu 3 da rabi domin aiwatar da shirin ba da tallafin rage radadin cutar corona da tada komadar tattalin arziki karkashin shirin noman fadama na 4 da na 5.

Alhaji Sagir Musa Ahmed ya bayyana cewar fiye da mutane dubu 30 ne za su ci gajiyar shirin.

Kazalika, majalisar zartarwar ta amince da kafa kwamitoci guda 2 domin mallakar jami’a mai zaman kanta ta Khadija University da ke Majiya a karamar Hukumar Taura dake Jihar

Kwamitocin sun hada da na kwararru karkashin jagorancin kwamishinan ma’aikatar ilimi mai zurfi, Dakta Isah Yusuf Chamo da na harkokin mulki karkashin jagorancin kwamishinan ilimi matakin farko Dakta Lawan Yunusa Danzomo.

Usman Mohammed Zaria