Labarai
Matashi Mai Yi Wa Kasa Hidima Ya Bada Tallafi A Asibitocin Jihar Zamfara
![](https://radionigeriakaduna.gov.ng/hausa/wp-content/uploads/2024/07/IMG-20240718-WA0013.jpg)
A wani yunkuri na bunkasa kiwon lafiyar mata masu juna biyu a jihar Zamfara, wani matashi mai yi wa kasa hidima mai suna Nwogu Chinonso, ya bayar da tallafin magunguna da sauran kayayyakin masarufi na daruruwan naira ga wasu cibiyoyin kiwon lafiya a matakin farko da ke Gusau babban birnin jihar.
Da yake jawabi yayin kaddamar da kayayyakin a fadar mai martaba sarkin Gusau, jami’in hukumar kula da matasa masu yi wa kasa hidima NYSC a jihar Zamfara, Alhaji Alhassan Abdulsalam ya yabawa matashin bisa wannan karamci.
Jami’in wanda ya samu wakilcin mataimakin daraktan sa ido kan ayyukan hukumar, Mista Isaac Maikur ya bayyana cewa, an kafa hukumar NYSC ne domin samar da hadin kai, zaman lafiya da cigaban kasa.
Ya jaddada cewa, aikin taimakawa al’umma wato CDS, shi ne ginshikin shirin na NYSC, tallafa wa marasa galihu.
Don haka Alhaji Alhasan ya gode wa Masarautar da wadanda suka dauki nauyin shirin bisa goyon bayan da suka bayar wajen ganin an cimma burin matashin na tallafawa rayuwar al’umma.
Da yake jawabi tun da farko, matashin, Mista Nwogu Chinonso wanda ya iya gano bukatun al’ummar yankin da aka tura shi, tare da kawo wadanda suka tallafa wa shirin, ya yi kira ga masu hannu da shuni, kamfanoni, jihohi da ƙananan hukumomi da su ɗauki nauyin ayyukan taimakon al’umma na matasa masu yi wa kasa hidima.
A nasa jawabin, mai martaba Sarkin Gusau, Alhaji Ibrahim Bello, ya yabawa matashin bisa wannan karamcin, wanda ya ce, ya zo akan gaba, kuma zai taimaka matuka wajen rage kalubalen da mata ke fuskanta a lokacin haihuwa da ma bayan haihuwa.
Sarkin wanda ya samu wakilcin babban hakimin yankin, Alhaji Bashir Kabir Danbaba ya kuma yi kira ga matasa masu yi wa kasa hidima da ke jihar da su yi koyi da wannan matashi.
Ya kuma yi amfani da wannan damar wajen ba da shawara ga matasan da su zauna lafiya a duk inda suka tsinci kansu.
Daga Sani Dutsinma
-
Kasuwanci7 days ago
PDP Katsina Ta Zabi Sabbin Shugabanni
-
Labarai6 days ago
Kamfanin Mai Na Kasa Na Fuskantar Matsalolin Kudaden Samar Da Man Fetur
-
Labarai6 days ago
Gwamna Lawal Ya Yi Sabon Nadi Ga Hukumar Asusun Kula Da Harkokin Tsaro
-
Kasuwanci6 days ago
Gwamnatin Tarayya Ta Fara Gina Rukunan Gidaje 500 A Kano
-
Labarai5 days ago
Shugaba Bola Tinubu Ya Jajantawa Iyalan Yar’Adua Bisa Rasuwar Hajiya Dada
-
Labarai7 days ago
Ku Gaggauta Kammala Ayukkan Da Ke Hannun Ku A Arewa Maso Gabas
-
Labarai3 days ago
ACF Ta Ce Babban Kalubalen Arewa Yanzu Shi Ne Rashin Tsaro
-
Fasaha7 days ago
Kungiyar Ecowas Za Ta Tallafa Ma Mabukata 14,694 A Jihohin Katsina Da Sokoto