Gwamna Radda Ya Ba Da Gudunmawar Dala Dubu 10 Ga Jamhuriyar Nijar

Biyo bayan rushewar masallacin garin Damagaram na Jamhuriyar Nijar, Gwamna Dikko Umar Radda na jihar Katsina ya bayar da gudunmawar Dala dubu 10 domin sake gina masallacin.

Masallacin dai na da dadadden tarihi domin an gina shi ne tun  shekaru 200 da suka wuce.

Gwamna Radda ya bayar da gudunmawar ne ta hannun mai ba shi shawara na musamman kan harkokin siyasa, Alhaji Ya’u Umar Gwajo-gwajo, wanda ke rike da sarautar ‘Turakin Damagaram’.

Yayin da yake bayyana godiyarsa ga Gwamnan bisa gudunmawar, mai alfarma Sarkin Musulmin Damagaram, Sultan Umaru Sanda, yace tallafin zai taimaka matuka wajen sake gina masallacin.

Ya ce gudunmawar hakan za ta inganta dadaddiyar alakar da ke tsakanin jihar Katsina da masarautar Damagaram wadda ta kai shekaru 500.

A nasa jawabin, Alhaji Ya’u Umar Gwajo-gwajo, ya shaida wa Sultan Umaru Sanda cewa Gwamna Dikko Radda ya bada gudunmawar ne saboda inganta tarbiyyar addini a masarautar.

“Wannan masallacin zai taimaka wajen cusa tarbiyyar addinin Musulunci a cikin al’ummarmu, kuma hakan zai taimaka wajen magance matsaloli da dama a cikin al’umma.

“Mu al’umma daya ce da turawa suka raba tsakaninmu, shi ya sa ya kamata mu karfafa alakar da ke tsakanin al’ummarmu kuma mu hada kai wajen magance kalubalen da muke fuskanta baki daya,” inji Gwajo-gwajo.

Daga Isma’il Adamu