Al’ummar Kauru Na Cikin Zullumi Bayan Lalacewar Gadar Da Ta Hadasu Da sauran Al’ummomin Jihar Kaduna

Ambaliya ta lalata hanya da gada tare da barin matafiya cikin zullumin rashin sanin ina zasu nufa a Garin Kauru hedikwatan karamar hukumar Kauru ta jihar Kaduna.

Al’ummar Garin na Kauru sun nuna damuwarsu kan mummunar ambaliyar ruwa da ta lalata wani bangare na hanya da gadar da ke hada garin Kauru, da sauran al’ummomi, inda yanzu haka matafiya suke can sun rasa nayi sabida wannan ce kadai hanyar da ake amfani da ita.

Wani shaidar gani da ido, Chiroman Yada Labaran Kauru Malam Sani Abanke, ya ce hanyar da abin ya shafa wanda ya hada Panbeguwa a karamar hukumar Kubau zuwa garin Kauru da kauyuka da dama da ke kewaye, hanya ce mai matukar muhimmanci wajen kwashe amfanin gonaki, sai gashi yanzu ruwa ya mata gyara.

Ya bayyana cewa barnar ta yi tasiri sosai ga tattalin arzikin yankin da kuma rayuwar yau da kullum, saboda mazauna yankin sun dogara sosai kan wannan titin don sufuri da kasuwanci.

Sauran masu amfani da hanyar da aka zanta da su sun yi kira da a yi gaggawar gyaran hanyar kafin ta gagari kunduli, tare da kira ga gwamnati a dukkan matakai su ja damara domin shawo kan lamarin.

Sun Kuma jaddada mahimmancin yin gyare-gyaren gaggawa don dawo da hanyoyin shiga da kuma tabbatar da tsaro da jin dadin jama’ar yankin.

Da yake jawabi a wurin da lamarin ya faru, bayan ziyarar gani da ido, Mai Martaba Sarkin Kauru, Alhaji Zakariyya Ya’u Usman, ya bayyana cewa akwai bukatar a dauki matakin gaggawa domin gyara halin da hanyar ke ciki.

A cewar Mai martaba yanayin hanyar ba kawai ya hana zirga-zirgar jama’a da kayayyaki ba, har ma yana haifar da babban hadari ga masu kokarin bin hanyar da ta lalace.

Don haka mai martaba Sarkin ya yi kira ga gwamnati da ta ba da fifikon wajen aikin sake ginawa tare da samar da abubuwan da suka dace.

Ya kuma jaddada bukatar samar da mafita mai dorewa don hana afkuwar al’amura a nan gaba da kuma tabbatar da ci gaban al’umma a yankin.

”Al’ummar Karamar Hukumar Kauru na fatan za a saurari kokensu kuma za a dauki matakin gaggawa don magance barnar da ambaliyar ruwan ta yi da kuma dawo da hanyar,”

Alhaji Zakariyya Ya’u II ya ci gaba da cewa a yayin da damina ke ci gaba da kara kaimi, lamarin ya kara tabarbarewa, kuma mazauna yankin sun jajirce wajen yin kira ga gwamnati da ta gaggauta kawo musu dauki domin rage musu radadin halin da suke ciki da kuma inganta ababen more rayuwa a karamar hukumar Kauru.

Rediyon Najeriya ya ruwaito cewa kusan shekaru tara kenan da gwamnatin da ta gabata ta bayar da kwangilar sake gina wannan hanya mai matukar muhimmanci.

A halin da ake ciki, mazauna yankin na ci gaba da fuskantar ƙalubale masu yawa yayin da suke ƙoƙarin nemo madadin hanyoyin sufuri da samun damar yin ayyuka masu mahimmanci.

COV/YUSUF ZUBAIRU KAURU