![\"\"](\"https:\/\/radionigeriakaduna.gov.ng\/hausa\/wp-content\/uploads\/2024\/02\/Akpabio-1-e1697726965455-300x194.webp\")
<\/p>\n<\/p>\n
Shugaban Majalisar Dattawa, Sanata Godswill Akpabio, ya ce Gwamnatin Tarayya ta bai wa kowanne gwamnan jiha naira biliyan 30 domin rage wa talakawa ra\u0257a\u0257in tsadar rayuwar da suke fuskanta.<\/p>\n
Akpabio ya bayyana haka ne a yayin zaman majalisar na ranar Talata, a ci gaba da tattauna irin halin \u0199uncin da jama\u2019ar kasar suka samu kansu a ciki, wanda ake dangantawa da cire tallafin mai.<\/p>\n
Shugaban majalisar ya ce ya samu wadannan bayanai ne daga wajen Hukumar Tara Ku\u0257a\u0257en Haraji ta Kasa wadda ta mi\u0199a wa jihohin wa\u0257annan ku\u0257a\u0257en da ake magana a kansu.<\/p>\n
Akpabio ya ce wa\u0257annan ku\u0257a\u0257en daban ne da naira biliyan bib-biyu da aka bai wa gwamnonin a watan Satumbar bara daga cikin biliyan biyar-biyar na rancen samar wa jama\u2019ar su tallafin rage ra\u0257a\u0257in cire tallafin man fetur.<\/p>\n
Shugaban majalisar ya bai wa gwamnonin shawara wajen yin amfani da wa\u0257annan makudan ku\u0257a\u0257e ta hanyar da ta dace domin ganin jama\u2019ar jihohin su sun samu tallafin da ya dace, musamman a bangaren abin da ya shafi abinci.<\/p>\n
Akpabio ya ce ana iya cimma nasarar gabatar da tallafin ne ta hanyar amfani da shugabannin kananan hukumomi saboda kusancin su da mutanen da ke yankunan karkara.<\/p>\n
Shugaban majalisar wanda ya yi Allah wadai da zanga-zangar da aka gani a wasu jihohin kasar da ake danganta su da tsadar rayuwa, ya zargi \u2018yan adawa da daukar nauyin su, duk da kokarin da ya ce Majalisar Dattawan na yi domin tunkarar matsalar tare da Gwamnatin Tarayya.<\/p>\n
Akpabio ya ce babu wani mahaifin da ke fatar ganin \u0257ansa ya kwanta ba tare da ya ci abinci ba, saboda haka ya bu\u0199aci takwarorinsa da su mayar da hankali a kan \u0257aukar matakin samo abinci duk inda yake domin wadata jama\u2019a.<\/p>\n