![\"\"](\"https:\/\/radionigeriakaduna.gov.ng\/hausa\/wp-content\/uploads\/2024\/03\/IMG-20240330-WA0031-300x169.jpg\")
<\/p>\n<\/p>\n
Gwamnan Jihar Kaduna, Uba Sani, ya ce gwamnatinsa ta gaji bashin dala miliyan 587 da bashin Naira biliyan 85 da kuma ayyukan kwangila 115 daga gwamnatin Nasir El-Rufai.<\/p>\n
Gwamnan, ya bayyana hakan ne a Kaduna a ranar Asabar yayin da yake jawabi a wajen wani taro, inda ya ce dimbin bashin da ake bin jihar na la\u0199ume abin da jihar ke samu.<\/p>\n
Ya bayyana cewa gwamnatin jihar ta ware Naira biliyan bakwai daga cikin Naira billiyan 10 da Gwamnatin Tarayya ta ware mata a watan Maris, domin biyan bashi.<\/p>\n
Gwamna Sani ya koka kan tashin farashin canji, wanda ya ce jihar na biyan kusan ninki uku na bashin da gwamnatin baya ta karbo.<\/p>\n
Ya Kuma koka da yadda gwamnatin El-Rufai ta bar wa jihar biliyan uku kacal a asusun jihar, wanda ya gaza biyan albashin ma\u2019aikata da ake biya na Naira biliyan 5.2 a duk wata.<\/p>\n
<\/p>\n
Gwamna Sani, ya ce gwamnatinsa ba ta ci bashin ko sisi ba tun bayan wata tara da ya hau mulki, duk da dimbin bashin da ya gada.<\/p>\n
\u201cMun yi nazari cikin tsanaki kan halin da muke ciki. Ina sanar da ku cewa duk da dimbin bashin da muka gada, har zuwa yanzu ba mu ciyo bashin ko kobo ba,\u201d in ji shi.<\/p>\n
Gwamnan ya kara da cewa muhimman abubuwan da gwamnatinsa ta sa a gaba sun hada da tsaro, samar da gidaje, ilimi, kiwon lafiya, da tallafa wa masu kananan sana\u2019o\u2019i.<\/p>\n
Ya ce gwamnatinsa za ta kuma mayar da hankali wajen samar da ci gaba ta hanyar saka hannun jari, inganta tattalin arziki da samar da gidaje masu sauki.<\/p>\n\n\t\t